Heb 2 | AGD | STEP | Máan tukhein nan mi setí ankan ma mumunan iyá tiferuna me ampen nampo mai ma funtákein baya ma sisimí iné tiferuna rasá dafían ákona ó tifano.

a 2:2 Kar 3:19

b 2:3 Ibu 10:29; 12:25

c 2:4 Mak 16:20; 1Ko 12:4, 11

dÍbo 8:4-6

e 2:9 Fir 2:8-9

f 2:11 Mat 25:40

gÍbo 22:22

hAis 8:17

iAis 8:18

j 2:141Yn 3:8; Rev 12:10

Hebrews 2

Kama Vaya Ma Oyan Amiyaren Ma Uman Baran Nain Baya Ino

1 Máan tukhein nan mi setí ankan ma mumunan iyá tiferuna me ampen nampo mai ma funtákein baya ma sisimí iné tiferuna rasá dafían ákona ó tifano. 2 ^aPara vara seyo, Tiyarafenu ano ma enisori kayo oo ráké uaren ma sikhá ein mai fura vaya kayon bákan banasi ano ma mai vaya átakharé uren ída yakhafein kéká ano uman bariyaren mino. 3 ^bMáan tiyaréin mi setin ma evaránen tiviran baya ma Bafan mano sian dákó uran ma inikhá ein kéká anon puran tino sen tetin tisimiyan mino. Mai ma setin ma evaránen tivíkein baya ma átakharé onté mai intesá uré karan oró tifante rafuno. 4 ^cTiyarafenu ano enará ukhein avúavá bá inká aní daná kayo vá pói aní iyáken maen inká bei anunu fintéi Kantá Aunan amusin amídú ukhen mino.

Yisasi Ma Uman Baren Purein Manon Ma Setin Evaránen Tivíkein Baya Ino

5 Mai ma ínaimpá erin nain bara van ma siyá tiferunará enisori kayo ano ída yafisinten mino. 6 Máan tinten mifo Tiyarafenui bompon dókifin máa sikhen mino.

“Inte anarasá banasi van iniya vákeya,
inká pará banasirá dafisiyá ba fono.
7 Manáarái véin maman enisori kayo aránaópá denan baré iyan,
kákan bí bá kakhan má póké béin kamamosí uantádeya,
8 minó daná ben aránaópá kae ono.” ^d
Tiyarafenu ano minó daná maman ben aránaópá kaúdan beni yafisin akhempá mana yaná ano ída van mifo saréa ma oné tifékun maen mai yanasinta ano ven aránaópá ída van mino. 9 ^eMáan tukhen mifo Yisasin ma maman enisori kayo aránaópá dan ma manáa rá baré íkan ma Tiyarafenu ano kákan bí bá kakhan má pó ma véin kini kamamosí uantákein mi oniyá tiféuno. Mai fara va ino. Tiyarafenui sarisari áupin mi Yisas Karaisi ano ma vara ráke nanin bantai ara ara uman baren púbin mino.

10 Mai ma minó daná uváden maman dan ma kamaen doriyain Tiyarafenu ano funtákein avúavá baren mi kokhon nanin banta avíden béi ma kákan bí manteiníen betin amen mino. Yisasin ma uman bareintái Tiyarafenu ano vanasi aya uren evaránen avían kakhantá kaen mino. 11 ^fMáan tukhein nan mi Yisas Karaisin má inká mai ma maman kantasí uantákein kéká bá Afóe mai mana anan ban mino. Mai ana van mi Yisas Karaisi ída ayave van inton kasaen te sun tifá kayo ino sen ariyan mino. 12 Mai van mi Tiyarafenui vompon dókifin béi máa sikhen mino.

Te sun tifá tiváeyan avorá eni kákan bí tian dákó onté uno,
monó nanin banta avorá í diyáké en aví daní onté uno.” ^g
13 Máa siren evaránen temí,

Tiyarafenurá anan tesi inin kaonté uno,” ^h
siren evaránen temí,

“Tiyarafenu ano ma simein iyampon kayo vá masi vá uno.” ⁱ

Yisasini Furin Mano Ma Ban Anoni Ákona Maman Bararasí Ukhein Baya Ino

14 ^jTiyarafenu akhafana mai amasi vá nare vápói uvantein pasen Yisas Karaisi yere mai avúavápin mi yorun afoká uven mai vukhafa vái varen mino. Barará banta an daven ma véi furein manon purini ákona ma fákakhá ein Ban Anoni ákona maman bararasíen mino. 15 Yisas Karaisi ma mai avúavásí ein manon mai ma furini akhokho ano ma vanasi yamuádan báken ma veni miyan ída varan doran nanin bantaí ma ukharé ein mi útúanten mino. 16 Para vara seyo, enisori kayo aya ono vara véi eren naifo, Abaraamun anavasin aya ono van mi erikhá mai afová ukhé tiféuno. 17 Máan ma ein manon tetin maman be aun afasí uren mi Tiyarafenu avorá tarisari vá puntákein monó ánon banta kékái ánon bantaí uven béin íkun uan amintin banasii ume ampiantanten mino. 18 Akhenókain uman béi varen afová ukhein pasen mai uman ma varan nain kéká kasaen aya inten mino.